في الوقت اللي احنا فيه ده مابقاش كفاية إن منتجك يكون جودته حلوة وسعره لقطة عشان تبيع ، احنا دلوقتي في عصر “خطف الانتباه”، يعني الشاطر هو اللي بيعرف يوفر وقت ومجهود العميل ، وأكبر عدو ليك مش المنافس اللي جنبك، ولكن عدوك الحقيقي هو “اللف والدوران” اللي بيخلي العميل يحس إنه داخل متاهة وهو بيشتري منك.
اولا : فلسفة البساطة … بلاش “دراما” في البيع
أصحاب مشاريع كتير بيقعوا في غلطة كبيرة إنهم بيحسسوا العميل إنه داخل “تحقيق” مش داخل يشتري ، يعني أول ما العميل يدوس “أضف إلى السلة”، هو كدة بيديك الضوء الأخضر، بس الضوء ده ممكن يقلب أحمر في ثانية لو قلبت اللحظة دي لـ “فيلم طويل” وممل من البيانات اللي مالهاش لازمة، العميل هيزهق ويسيب السلة ويمشي.
1. سيكولوجية الزبون وفخ التعقيد
الإنسان بطبعه بيحب السكة السهلة ، وفي قانون بيقول إنك كل ما تزود الاختيارات والطلبات العميل بياخد وقت أطول علشان يقرر، وفي الآخر ممكن ما يشتريش أصلاً.
تخيل عميل لقى قدامه فورم (استمارة) بتطلب منه:
يعمل حساب ويأكد الإيميل.
يختار باسورد صعبة ويحفظها.
يكتب تفاصيل العنوان (الشارع، الحي، الرمز البريدي، وعلامة مميزة).
يجاوب على سؤال “عرفتنا منين؟”.
هنا مخ العميل بيدي إشارة: “هو الموضوع يستاهل كل التعب ده؟” وفي لحظة بيقفل الصفحة وتضيع عليك بيعة كانت مضمونة.
2. استراتيجية “المفيد المختصر”
عشان متجرك يبقى مكنة مبيعات، لازم تطلب “أقل القليل” من البيانات ، يعني اسأل نفسك عن كل خانة: “لو العميل مكتبش المعلومة دي مش هعرف أشحن له؟”لو الإجابة “لا” شيل الخانة دي فوراً.
خاصية “الشراء كضيف” (Guest Checkout): دي مش رفاهية، دي أساس إنك تجبر العميل يعمل حساب قبل ما يشتري ده أكبر “طارد” للعملاء ، خليه يشتري بإيميله بس وبعد ما يدفع قول له: “تحب نحفظ بياناتك عشان المرة الجاية تشتري بضغطة واحدة؟” ، وقتها هيوافق وهو مبسوط لأنه شايف إن دي مصلحة ليه.
اختصار العناوين: بدل ما تقسم العنوان لـ 10 خانات، استعمل خاصية “الإكمال التلقائي” من خرائط جوجل، أو سيب له خانة واحدة كبيرة يكتب فيها عنوانه براحته.
3. بلاش “نقط عمياء” في السكة
التعقيد مش بس في كتر الخانات، ده كمان في “الغموض”.
شريط الخطوات (Progress Bar): لما العميل يشوف إنه في الخطوة “2 من 3″، بيرتاح نفسياً الوضوح بيدي ثقة.
المصاريف المستخبية هي “رصاصة الرحمة”: مفيش أوحش من إن العميل يوصل لآخر خطوة ويتفاجئ بمصاريف شحن أو ضرائب ماكنش يعرفها ، وده بيحسسه إنه اتضحك عليه خليك دغري من الأول واعرض سعر الشحن بوضوح.
4. ركز على “الموبايل” (Mobile-First)
أغلب الناس بتشتري من الموبايل وهي ماشية أو قاعدة ، اللي شكله سهل على الكمبيوتر ممكن يكون كابوس على شاشة الموبايل.
أزرار كبيرة: خلي زرار “إتمام الشراء” واضح وصريح.
كيبورد ذكي: لما تطلب رقم تليفون، خلي لوحة الأرقام تظهر لوحدها، ولما تطلب إيميل تظهر لوحة الحروف ” التفاصيل الصغيرة دي هي اللي بتبين المحترف من الهاوي” .